Lögmaður Grímsnes- og Grafningshrepps leggur til að nýlegum dómi Héraðsdóms Suðurlands um ferðaþjónustu við fatlaða verði áfrýjað til Hæstaréttar nái frumvarp um verkaskiptingu sveitarfélaga og ríkis ekki fram að ganga.
Sveitarstjórn hyggst fresta ákvörðun um áfrýjun þar sem líkur eru til að málaflokkurinn færist til sveitarfélagsins um áramót.
Dómurinn kvað á um að sveitarfélaginu sé skylt að veita fötluðum einstaklingi, búsettum á Sólheimum, ferðaþjónustu fatlaðra í samræmi við ákvæði laga nr. 59/1992. Sigurður Jónsson lögmaður sveitarfélagsins sagði í samtali við Sunnlenska að fötluðum vistmönnum á Sólheimum standi þessi þjónusta nú þegar til boða og því hagnist viðkomandi einstaklingur ekki á niðurstöðu dómsins. Sveitarstjórnin samþykkti að fresta ákvörðun um áfrýjun dómsins þar til í ljós komi hvort frumvarp um verkaskiptingu sveitarfélaga og ríkis nái fram að ganga. Málið falli hins vegar um sjálft sig ef verkaskiptingin nær fram að ganga.
Deilur vegna ferðakostnaðar fatlaðra á Sólheimum hafa staðið lengi yfir og nýverið vísaði félagsmálanefnd uppsveita Árnessýslu frá umsókn fimm fatlaðra einstaklinga frá Sólheimum um ferðaþjónustu m.a. á þeirri forsendu að þær virtust vera sendar af starfsmönnum Sólheima sem hluti af langvarandi deilum Sólheima og Grímsnes- og Grafningshrepps og að ekki fylgdu með undirskriftir umsækjenda né umboð frá þeim til handa starfsmanni Sólheima sem sótti um fyrir þeirra hönd.