Biðröð við nýja verslunarmiðstöð

Það var röð langt út úr dyrum þegar ný verslunarmiðstöð Bónus og Hagkaupa opnaði við Larsenstræti á Selfossi kl. 10 í morgun.

Þetta er fyrsta verslun Hagkaupa sem opnar á Suðurlandi en Bónus flytur sig nú um set á Selfossi og stækkar til muna en verslunin við Larsenstræti er 1.400 fermetrar.

Fjöldi manns var samankominn við opnunina til að fagna nýju verslununum og nýta sér opnunartilboð sem eru í gangi um helgina.

Við þetta tækifæri afhentu Verslunarmannafélag Suðurlands og Báran-stéttarfélag Bónus á Selfossi viðurkenningu en Bónus Selfossi var valið fyrirtæki ársins 2011 í könnun stéttarfélaganna á Suðurlandi. “Ánægja og gott starfsfólk er dýrmætasta eign hvers fyrirtækis,” segir á viðurkenningarskjalinu sem fulltrúar félaganna afhentu í morgun.