Fyrsta skóflustungan að stækkun björgunarmiðstöðvarinnar á Selfossi var tekin í kvöld en framkvæmdir við bygginguna munu hefjast í vikunni.
Sveinn Ægir Birgisson, formaður Björgunarfélags Árborgar, tók fyrstu skóflustunguna að viðstöddum fjölda félagsmanna.
„Í viðbyggingunni fara 180 fermetrar undir tækjageymslu og tæpir 130 fermetrar í búnaðargeymslu og félagsaðstöðu, það er umtalsverð stækkun á húsnæðinu og veitir ekki af. Það er búið að fjölga mikið í sveitinni hjá okkur og stórir og öflugir nýliðahópar að koma inn og okkur vantar sérstaklega geymslupláss fyrir búnað félagsmanna. Síðan vorum við að bæta við okkur einum bíl og það er búið að vera þröngt um okkur í tækjageymslunni, þannig að þetta er nauðsynleg framkvæmd,“ sagði Sveinn Ægir í samtali við sunnlenska.is.
Virkir félagsmenn í Björgunarfélagi Árborgar eru um það bil 90 yfir árið og þar af eru yfir 40 á útkallslista.
„Við erum búin að vera í fjögur ár að undirbúa þessa framkvæmd og við erum að vona að við getum tekið húsnæðið í notkun öðru hvoru megin við áramót. Vonandi náum við að selja flugeldana í þessu rými fyrir áramótin, en það verður bara að koma í ljós,“ bætir Sveinn við.
Viðbyggingin verður í sama stíl og eldri hluti björgunarmiðstöðvarinnar, límtré klætt með yleiningum en stærri útkeyrsluhurð verður á nýja hlutanum fyrir snjóbíl sveitarinnar. Sveinn segir að viðbyggingin sé að stærstum hluta fjármögnuð með eigin fé sveitarinnar.
„Við erum að geyma aðrar framkvæmdir á meðan, endurnýjun á tækjum og slíku. Við eigum góða bakhjarla og erum með þjónustusamning við Sveitarfélagið Árborg og fleira. Svo fáum við hluta virðisaukaskatts endurgreiddan frá ríkinu en sá stuðningur hefur minnkað og það er mjög miður að staðan sé þannig. Það myndi klárlega muna um það því þarna eru milljónir í húfi. Það þýðir einfaldlega að við verðum að standa lengur úti í verslunum að selja Neyðarkallinn eða flugelda. Þetta er mikil vinna fyrir félagsmenn að leggja á sig en þeir eru tilbúnir í það og það er aðal ástæðan við það að við förum í þessa framkvæmd,“ sagði Sveinn Ægir að lokum.