Barnaskólinn á Eyrarbakka og Stokkseyri fékk styrk frá Sprotasjóði vegna verkefnisins „BES lítur sér nær“. Þetta verkefni felur í sér að BES ætlar að leita til nærsamfélagsins um samstarf í skólamálum.
Um er að ræða samstarf við fyrirtæki, félagasamtök og einstaklinga, ekki er skilyrði að viðkomandi tengist skólanum eitthvað fyrir. Markmiðið með verkefninu er meðal annars að róa á ný mið og fá inn nýjar hugmyndir og tækifæri svo skólinn sé hluti af samfélaginu og að samfélagið taki þátt í skólastarfinu.
„Þetta samstarf getur verið í ýmis konar formi, svo sem að nemendur skólans fái að koma í heimsókn í fyrirtæki eða stofnanir á svæðinu. Fái að kynna sér starfsemi og fræðast um fyrirtækið. Þetta getur verið bundið við eina heimsókn eða verkefni sem byggir á fleiri heimsóknum og jafnvel að fyrirtækið sendi fólk í skólann til að ræða við nemendur. Þetta getur verið samstarf við félagasamtök um kynningar á þeim, heimsóknir á báða bóga og einnig verkefni sem unnin væru af nemendum í samráði við viðkomandi félagasamtök. Eins getur þetta verið samstarf við einstaklinga sem kæmu í skólann og segðu frá lífi sínu í nærsamfélagi skólans eða læsu fyrir nemendur eða spjölluðu við þá um lífið og tilveruna hér við ströndina,“ segir í tilkynningu frá skólanum.
Fyrsta skrefið er að skipuleggja atburði og funda með þeim aðilum sem verkefnið snýst um. BES ætlar að byrja á fundi þar sem allir áhugasamir (og hinir líka) eru velkomnir til að ræða útfærslu á þessu verkefni og koma með hugmyndir um hvað er hægt að gera og hvernig það verður framkvæmt. „Það er mikilvægt fyrir okkur í BES að samfélagið í kringum okkur komi að þessu og eru allar hugmyndir mjög vel þegnar.“
Áhugasamir eru beðnir um að taka frá 27. október til að mæta á fund í BES á Stokkseyri. Nánari upplýingar um fundinn verða sendar út síðar.
Ef einhverjum liggur á að koma sinni hugmynd á framfæri fyrir fundinn þá er velkomið að hringja í Sirrý deildarstjóra og verkefnisstjóra verkefnisins í síma 480-3214 eða senda tölvupóst á netfangið sigridurp@barnaskolinn.is.