Bergþóra Eiðsdóttir hefur tilkynnt að hún gefi kost á sér til formanns Verkalýðsfélags Suðurlands, en stjórnarkjör hjá félaginu fer fram á vormánuðum.
Bergþóra hefur starfað hjá félaginu frá október 2024 og býður sig fram gegn sitjandi formanni, Guðrúnu Elínu Pálsdóttur, sem hefur starfað hjá félaginu frá árinu 2002.
Þetta verða fyrstu stjórnarkosningar í sögu Verkalýðsfélags Suðurlands, en hingað til hafa listar uppstillingarnefndar verið sjálfkjörnir.
Í tilkynningu frá framboðinu kemur fram að Bergþóra sé spennt fyrir komandi kosningabaráttu og hlakki til að bjóða félagsmönnum upp á raunverulegt val um forystu í fyrsta sinn í sögu félagsins. Hún leggur sérstaka áherslu á að félagið verði enn sterkara, aðgengilegra og nær félagsmönnum sínum, með skýra þjónustu, gagnsæi og virkt samtal.
Á næstu vikum mun Bergþóra halda fundi með félagsmönnum víðs vegar um félagssvæðið og kynna meðframbjóðendur til stjórnar. Hún segist leggja áherslu á að félagsmenn eigi lokaorðið í öllum mikilvægustu ákvörðunum, þar á meðal hugsanlegum sameiningum við önnur stéttarfélög og fjárfestingum, og að félagið starfi fyrst og fremst fyrir þá félgsmenn sem því tilheyra.