Sunnudaginn 23. ágúst verður fjölskylduhátíð og matarmarkaður í Bjálmholti í Rangárþingi ytra, þar sem Eimverk er til húsa, í tilefni af hinum árlega Beint frá býli degi.
Þetta er fjórða árið í röð sem Beint frá býli dagurinn er haldinn en þá eru uppákomur í öllum landshlutum og er Bjálmholt fulltrúi Suðurlands í ár.
Markmiðið er að vekja athygli á hugmyndafræði beint frá býli og smáframleiðslu matvæla, efla tengsl milli framleiðenda og neytenda og hvetja fleiri til að hasla sér völl á því sviði. Tilgangurinn er kynna íbúum starfsemi heimavinnsluaðila á lögbýlum og smáframleiðslu matvæla í héraði og byggja upp tengsl milli þeirra.
Bygg ræktað fyrir vískíframleiðslu
Á sunnudaginn munu heimavinnsluaðilar og smáframleiðendur úr landshlutanum mæta í Bjálmholt til að kynna og selja vörur sínar. Á bænum eru landnámshænur og kornakrar allt um kring, en þar er ræktað bygg til viskíframleiðslu. Boðið verður upp á skoðunarferðir um kornþurrkunina og viskíkjallarann.
Í Bjálmholti er stefnt að því að reisa 1.500 fm hús, sem mun hýsa nýja eimingarverskmiðju og gestastofu. Hluti af gestastofunni verður verslun og er viðburðurinn á Beint frá býli deginum fyrsta skrefið í að kynna staðinn fyrir heimamönnum.
Mikil uppbygging framundan
Eimverk Distillery var stofnað árið 2009 og er fyrsta viskígerð Íslands sem framleiðir viskí úr 100% íslensku byggi.
„Vor Icelandic gin var fyrsta varan okkar sem við settum á markað 2014. Árið 2015 kom Víti Brennivín út og 2017 kom fyrsta íslenska viskíið, Flóki, á markað. Síðan þá hafa bæst við fjórar aðrar útgáfur af Flóka,“ segir Eva María Sigurbjörnsdóttir hjá Eimverk í samtali við sunnlenska.is.
„Árið 2021 kom fyrsta íslenska rúg-viskíið á markað og 2024 bættist við Kría vodki úr íslensku byggi. Það sem er að taka við núna er uppbygging á mun stærra eimingarhúsi í Bjálmholti, og mun öll framleiðslan og gestastofan flytjast þangað úr Garðabæ. Nýja húsið mun hýsa framleiðsluna frá möltun að pökkun í flöskur, gestastofu þar sem hægt verður að taka á móti ferðamönnum í kynningar og smakkanir og síðan verslun með vörum og handverki úr héraði.“
„Síðustu sautján ár hafa verið mjög skemmtileg. Fjögur ár í þróun og þrettán ár í framleiðslu. Vörurnar okkar eru seldar út um allan heim þar á meðal talið Þýskalands, Japans, Englands og USA svo eitthvað sé nefnt.“
Skoðunarferðir og matarmarkaður
Sem fyrr segir verður Beint frá býli dagurinn haldinn á sunnudaginn og eru gestir og gangandi velkomnir í Bjálmholt frá klukkan 13-16.
„Undirbúningur fyrir daginn gengur mjög vel, á markaðnum verður ýmislegt úr héraði í boði. Boðið verður upp á reglubundnar skoðunarferðir um kornþurrkunina og viskíkjallarann og matar og handverksmarkaður verður í nýju vélarskemmunni. Við hlökkum mikið til að taka á móti gestum á sunnudaginn,“ segir Eva María að lokum.