Maðurinn sem leitað hefur verið að á og við Þingvallavatn frá því á laugardaginn er fertugur belgískur ferðamaður. Lögreglan hefur verið í sambandi við aðstandendur mannsins og hefur ekkert heyrst frá honum frá því fyrir laugardag.
Lögreglan telur yfirgnæfandi líkur á því að maðurinn hafi siglt út á vatnið á kajaknum á laugardag og fallið útbyrðis, en strekkingsvindur hefur verið á svæðinu og aðstæður til siglinga ekki verið góðar.
Um miðjan dag á laugardag fundust mannlaus kajak og bakpoki á floti á sunnanverðu Þingvallavatni, við Villingavatn. Leitað hefur verið úr lofti, láði og legi og hefur leitin fram til þessa ekki borið árangur.
Ekki er vitað hvaðan hann maðurinn frá ströndu og því er leitarsvæðið stórt og erfitt. Búið er að sigla um vatnið allt og ganga fjörur meðfram því án árangurs.
Lögreglan hefur því tekið þá ákvörðun að bíða með frekari leit í bili en taka stöðuna aftur í fyrramálið. Kafarasveit frá sérsveit ríkislögreglustjóra er að fara yfir möguleika á því að kafa niður að inntaki við Steingrímsstöð.