Bæjarráð Árborgar samþykkti sex mánaða árshlutauppgjör sveitarfélagsins á fundi sínum í lok ágúst. Uppgjörið, sem er óendurskoðað innanhússuppgjör, gefur vísbendingar um jákvæða þróun í átt að settu marki þótt óhagstætt efnahagsumhverfi hafi töluverð áhrif á rekstrarniðurstöðuna.
Rekstrarniðurstaða fyrir afskriftir og fjármagnsliði á fyrstu sex mánuðum ársins er jákvæð um 595 milljónir króna fyrir A og B hluta samstæðunnar, samanborið við 437 milljónir allt árið 2022. Tekjur eru meiri en áætlanir gerðu ráð fyrir og rekstrargjöld lægri.
Á móti hafa fjármagnsliðir hækkað mikið og heildarniðurstaða tímabilsins er því neikvæð um 1,3 milljarð króna á móti 1,25 milljarði í áætlun. Þar vegur þyngst hærri verðbólga en gert var ráð fyrir í fjárhagsáætlun.
Sá fyrirvari er á uppgjörinu að þar er ekki tekið mið af rekstraráhrifum byggðasamlaga og annarra samstarfsverkefna á tímabilinu.
Í tilkynningu frá sveitarfélaginu er starfsmönnum þakkað fyrir framlag þeirra, samheldni og elju í erfiðum hagræðingaraðgerðum. „Bæjarfulltrúar og starfsmenn muna áfram vinna að hagræðingu í rekstri sveitarfélagsins með aðgerðum sem fela í sér aukningu á tekjum, lækkun rekstrargjalda, endurhögun efnahagsreiknings og aðhaldi í fjárfestingum til að tryggja áframhaldandi öfluga grunnþjónustu fyrir íbúa.“
Sveitarfélagið hefur til margra ára lagt fram mánaðarlegt rekstraruppgjör en þetta er í fyrsta skipti sem 6 mánaða árshlutauppgjör er lagt fram og í tilkynningu frá Árborg kemur fram að stefnan sé að gera það áfram.