Bannsvæði í kílómeters radíus

Eftir að hafa lagt mat á aðstæður hefur Almannavarnanefnd ákveðið að opna fyrir umferð inn í Þórsmörk. Öll almenn umferð gangandi og vélknúinna farartækja er bönnuð í 1 km radíus frá eldstöðinni og nær það einnig til leiðarinnar að Hrunagili frá Fimmvörðuhálsi.

Fólk er sérstaklega beðið um að hafa vara á sér þegar farið er yfir Hvanná þar sem aðstæður gætu breyst með skömmum fyrirvara en hraun rennur nú efst í Hvannárgili.

Göngufólki frá Þórsmörk er heimilt að fara að Morinsheiði en bannað er að fara um Heljarkamb og upp á Bröttufönn.

Gönguleiðin frá Skógum upp á Fimmvörðuháls er opin en umferð vélknúinna farartækja upp Skógaheiði er aðeins ætluð lögreglu og björgunarsveitum.

Leiðin upp á Mýrdalsjökul frá Sólheimajökli er opin en hún er aðeins fær mikið breyttum jeppum. Sprungur eru í grennd við akstursleiðina upp jökulinn og þurfa ökumenn að vera meðvitaðir um það.

Hættusvæði er áfram skilgreint í 5 km radíus frá eldstöðinni og þeir sem fara þar um gera það á eigin ábyrgð.

Í tilkynningu frá Almannavörnum er tekið fram að mikilvægt er að fólk sem er á ferð um svæðið virði lokanir og fari eftir fyrirmælum og leiðbeiningum frá lögreglu og björgunarsveitarfólki sem er á staðnum.