Banaslys varð á Suðurlandsvegi austan við Kirkjubæjarklaustur um klukkan 00:40 í nótt þegar flutningabíll lenti út af veginum og valt. Farþegi í bílnum lést en ökumaðurinn slasaðist ekki.
Í tilkynningu frá lögreglunni segir að ofsaveður hafi verið á vettvangi, á tíðum ekki stætt í hviðum og varð tjón á björgunartækjum þegar rúður fuku úr þeim. Einungis björgunarstörf voru því unnin á vettvangi en hann síðan yfirgefinn og verður unnið að vettvangsrannsókn í dag eftir því sem veður gengur niður.
Að henni koma, auk lögreglu á Suðurlandi, tæknideild lögreglunnar á höfuðborgarsvæðinu og Rannsóknarnefnd samgönguslysa og eru þessir aðilar á leið á vettvang til þeirrar vinnu.
Lögreglan getur eki veitt frekari upplýsingar um málið eða rannsókn þess að sinni.