Laust fyrir kl. 23 í gærkvöldi barst lögreglunni á Suðurlandi tilkynning um alvarlegt umferðarslys á Þrengslavegi, austan Litla-Sandfells, þar sem bifreið hafði hafnað utan vegar og oltið.
Tveir voru í bílnum og reyndist annar án lífsmarka þegar að var komið en endurlífgunartilraunir báru ekki árangur. Hinn var fluttur á Landspítala háskólasjúkrahús til skoðunar og aðhlynningar.
Tildrög slyssins eru til rannsóknar hjá rannsóknadeild lögreglunnar á Suðurlandi og rannsóknanefndar samgönguslysa.
Þetta kemur fram í tilkynningu frá lögreglunni á Suðurlandi, sem veitir ekki nánari upplýsingar um slysið að svo stöddu.