Banaslys á Biskupstungnabraut

Karlmaður á sjötugsaldri er látinn eftir harðan árekstur fólksbíls og jepplings á Biskupstungnabraut, nokkuð ofan við Borg í Grímsnesi, um klukkan 14 í dag.

Erlend hjón á ferðalagi voru í öðrum bílnum og sluppu þau lítið meidd en eru þó enn til eftirlits á sjúkrahúsi í Reykjavík. Bifreið þeirra kastaðist út fyrir veginn og valt við áreksturinn.

Íslenskur karlmaður á sjötugsaldri sem var einn í hinni bifreiðinni slasaðist mikið og var fluttur af vettvangi með sjúkrabifreið til móts við þyrlu LHG sem flutti hann á sjúkrahús í Reykjavík. Endurlífgunartilraunir sem vegfarendur, þ.m.t. ökumaður og farþegi hinnar bifreiðarinnar hófu á vettvangi og var fram haldið á leið á sjúkrahús af sjúkraliði báru ekki árangur og var maðurinn úrskurðaður látinn fljótlega eftir komu þangað.

Rannsóknardeild lögreglunnar á Selfossi fer með rannsókn málsins og nýtur við það aðstoðar bíltæknifræðings.

Ekki er unnt að birta nafn hins látna að svo stöddu.