Ferjurnar Baldur og Herjólfur munu báðar sigla til og frá Vestmannaeyjum frá og með næsta mánudegi. Þetta fyrirkomulag verður við lýði meðan unnið er að viðgerð á einni vél Herjólfs sem bilaði í apríl. Gert er ráð fyrir að viðgerð á vélinni ljúki upp úr miðjum júní.
Vegna mikilla anna í flutningum til og frá Vestmannaeyjum á næstunni var talið nauðsynlegt að varaskipið Baldur bættist við ferjuþjónustu til Eyja á þessu tímabili. Miklir flutningar eru fyrirhugaðir á fólki og farartækjum, m.a. vegna íþróttaviðburða um helgar.
Vegna erfiðra aðstæðna og óhagstæðs veðurfars hefur lítið mátt út af bregða að siglingaáætlun Herjólfs raskist. Þegar Herjólfur siglir aðeins á einni vél getur skipið illa siglt til Landeyjahafnar ef ölduhæð fer yfir 2 m og/eða ef vindur er yfir 12 m/s en það er ekki óalgengt á þessum árstíma.
Eyjólfur Ármannsson, innviðaráðherra, kynnti þessar breytingar á íbúafundi sem Vegagerðin hélt í Vestmannaeyjum síðdegis í dag. Samráð hefur verið haft við heimamenn í Eyjum og í Breiðafirði vegna þessara breytinga sem eru til komnar vegna vélarbilunar Herjólfs en Ferjan Særún mun sinna siglingum til Flateyjar á Breiðafirði í fjarveru Baldurs.