Fimmta og síðasta helgi Bændamarkaðar Krónunnar fer fram helgina 25. til 27. september í verslunum Krónunnar á Selfossi, í Þorlákshöfn, á Hvolsvelli og í Vík í Mýrdal. Þar verður boðið upp á ferskt og ópakkað íslenskt grænmeti á meðan birgðir endast, en úrval og magn ráðast af uppskeru og afhendingum frá bændum. Markaðurinn hófst í lok ágúst í öllum 26 verslunum Krónunnar.
Suðurland er stærsta ræktunarsvæði grænmetis á Íslandi og kemur stór hluti uppskerunnar á markaðnum frá garðyrkjubændum á svæðinu, meðal annars frá Flúðum, Reykholti, Böðmóðsstöðum og Laugarási.
Bændamarkaðurinn er nú haldinn í tíunda sinn í samstarfi við Sölufélag garðyrkjumanna. Alls taka tuttugu bændur þátt í ár og hefur verið boðið upp á yfir þrjátíu tegundir af íslensku grænmeti. Á markaðnum árið 2025 seldust rúmlega 145 tonn af fersku og ópökkuðu grænmeti.
„Bændamarkaðurinn er ákveðin uppskeruhátíð og það er sérstaklega ánægjulegt að halda síðustu helgina hátíðlega á Suðurlandi, þar sem stór hluti íslensku uppskerunnar á rætur sínar. Markaðurinn gefur fólki tækifæri til að njóta grænmetisins þegar það er sem ferskast og um leið kynnast fjölbreytninni í íslenskri ræktun,“ segir Jón Hannes Stefánsson, vöruflokkastjóri ávaxta og grænmetis hjá Krónunni.
