Framrás ehf í Vík átti lægra tilboðið í endurbætur hringvegarins vestan við Lómagnúp, sem vinna á að í sumar.
Bæði tilboðin voru talsvert yfir áætluðum verktakakostnaði Vegagerðarinnar, tilboð Framrásar hljóðaði upp á 47,6 milljónir króna og var 20,7% yfir áætlun. JG-vélar ehf í Reykjavík buðu 51,3 milljónir króna og var tilboðið 30% yfir áætlun.
Um er að ræða endurmótun, styrkingu og lítilsháttar breikkun á 1,4 km kafla frá Aurá að Krossá, vestan við Lómagnúp.
Verkinu á að vera lokið þann 15. ágúst næstkomandi.