Aukinn gosóri hefur verið í Eyjafjallajökli í kvöld og hefur sést svartur mökkur frá fjallinu að sögn Veðurstofunnar.
Að sögn Gunnars B. Guðmundssonar jarðvísindamanns á Veðurstofu Íslands jókst virknin mjög skarpt upp úr kl. 17 fram til kl. 19:50 og svo aftur nú laust fyrir 21, en dettur niður þess á milli.
„Þetta er mesti órói sem við höfum séð frá þeim tíma þegar virknin féll að mestu niður. Það getur verið að það hafi komið einhver kvika þarna upp, það er ómögulegt að segja, en það er eins og það hafi orðið einhvers konar gufusprengingar eða aukið gasstreymi með hávaða og látum, það er allavega einhvers konar sprengivirkni,“ segir Gunnar. Hinsvegar hafa engir djúpir skjálftar verið og engar landbreytingar samkvæmt GPS mælingum.
Gunnar segir hugsanleg að svarti mökkurinn sem tilkynnt hefur verið um hafi stafað af því að aska, sem nóg er af fyrir í kringum gosstöðvarnar, hafi þyrlast upp við sprengingu.
Þetta kemur fram á mbl.is.