Aukin þjónusta sérfræðinga á Suðurlandi

Heilbrigðisstofnun Suðurlands hefur gert samkomulag við Sjúkratryggingar Íslands um aukna þjónustu sérfræðinga á Suðurlandi.

Annars vegar er um er að ræða þjónustu húðlæknis og öldrunarlæknis, sem ekki hefur verið áður í boði á Suðurlandi. Hins vegar er um að ræða aukna þjónustu barnalæknis.

Gísli Ingvarsson, sérfræðingur í húðlækningum, hefur þegar hafið störf og auglýst hefur verið eftir sérfræðingum í öldrunar- og barnalækningum. Vonir standa til að hægt verði að hefja og styrkja þjónustu í þeim sérgreinum sem fyrst.

Samkomulag HSu og SÍ um aukna þjónustu sérfræðinga á Suðurlandi er eitt fyrsta skrefið til að styrkja sérfræðiþjónustu sem næst íbúum og á heimasíðu stofnunarinnar kemur fram að áfram verði leitast við að styrkja aðra sérfræðiþjónustu á þjónustsvæði HSu.