Páfagaukurinn Seifur sem var stolið úr búri sínu í dýragarðinum á Slakka í Laugarási í júní var auglýstur til sölu á vefnum bland.is í síðustu viku.
Um miðjan júní fékk lögreglunni á Selfossi tilkynningu um að Scarlet Macaw páfagauki hefði verið stolið úr búri sínu á Slakka. Fuglinn hafði verið í búri sínu að kvöldi 16. júní en var horfinn að morgni þess 17.
Ekkert hafði spurst til fuglsins fyrr en í síðustu viku þegar hann var auglýstur til sölu á bland.is og þar gefið upp símanúmer sem átti að hringja í. Úrskurð dómara þurfti til að afla upplýsinga frá símafyrirtæki um hver stæði á bak við auglýsinguna.
Lögreglan á höfuðborgarsvæðinu fór á heimili þess sem sendi inn auglýsinguna sem reyndist vera unglingur. Þar var enginn páfagaukur en skýring á auglýsingunni var sá að um hrekk væri að ræða.
Unglingar höfðu auglýst ísskáp á bland.is og gefið upp símanúmer hjá félaga sínum. Til að ná fram hefndum ákvað sá sem varð fyrir hrekknum að taka upp frétt úr DV frá í sumar þar sem lýst var eftir páfagauknum og nota upplýsingar og mynd úr fréttinni til að setja í auglýsinguna og gefa þar upp símanúmer þess sem upphóf hrekkinn.
Seifur er enn týndur og ekkert til hans spurst. Lögreglan biður því alla sem vita um afdrif páfagauksins Seifs eða hvar hann gæti verið niðurkominn að hafa samband í síma 480 1010. Hann er 12 ára og er þessi tegund er mjög dýr og nokkuð stór, vænghaf hátt í 120 sentimetrar og getur orðið meira en 50 ára gamlir.