Verslunarmannahelgin á Suðurlandi hefur gengið að mestu vel samkvæmt upplýsingum frá lögreglunni á Suðurlandi og síðasti sólarhringur þar engin undantekning, þrátt fyrir nokkurn eril á stundum.
Lögreglan heldur uppi öflugu umferðareftirliti við Landeyjahöfn í dag, sem og víðar í umdæminu, enda margir ferðalangar á heimleið eftir gleðskap helgarinnar.
Síðasta sólarhringinn hafa átta ökumenn verið stöðvaðir, grunaðir um vímuakstur, fimm fyrir ölvunarakstur og þrír fyrir fíkniefnaakstur.
Á heimferðardegi, sem og aðra daga, leggur lögreglan áherslu á að menn fari varlega í umferðinni, taki sér tíma, og gæti þess að leggja ekki of snemma af stað og ekki fyrr en tryggt er að ökumenn séu hæfir til aksturs.