Ingunn Jónsdóttir, framkvæmdastjóri SASS og Ingveldur Sæmundsdóttir, framkvæmdastjóri Háskólafélags Suðurlands, undirrituðu á dögunum samning um framkvæmd nýs áhersluverkefnis Sóknaráætlunar Suðurlands sem ber heitið Kveikjan Suðurland.
Verkefnið hlýtur átta milljóna króna framlag úr Sóknaráætlun Suðurlands en heildarkostnaður þess er áætlaður tíu milljónir króna. Meginmarkmið verkefnisins er að efla nýsköpunarhæfni starfandi fyrirtækja á Suðurlandi og gera nýsköpun að markvissum og eðlilegum hluta af daglegum rekstri.
Sænsk aðferðafræði aðlöguð að sérstöðu Suðurlands
Kveikjan Suðurland byggir á hinni virtu og reyndu aðferðafræði Ignite Sweden, auk þess að nýta dýrmæta reynslu DriftarEA af innleiðingu Kveikjunnar á Norðurlandi. Verkefnið miðar að því að virkja innri kraft sunnlenskra fyrirtækja með því að vinna með raunverulegar áskoranir þeirra í síbreytilegu rekstrarumhverfi. Á fyrsta stigi verkefnisins verður lögð rík áhersla á yfirfærslu á þekkingu og aðferðafræði frá DriftEA yfir til Háskólafélags Suðurlands, sem mun leiða framkvæmdina hér á svæðinu.
Tilraunalota með sunnlenskum fyrirtækjum
Verkefnið mun hefjast á því að vinna markvisst með tvö til fjögur fyrirtæki á Suðurlandi í sérstakri tilraunalotu. Í þeirri vinnu verða áskoranir þátttökufyrirtækjanna greindar ítarlega og þær tengdar beint við öflug nýsköpunarteymi, frumkvöðla og háskólaverkefni. Með þessu móti verður aðferðafræðin prófuð og löguð að sérstöðu sunnlenska atvinnulífsins, sem leggur grunn að því að hægt verði að innleiða verkefnið með varanlegum hætti í landshlutanum.
Áætlað er að verkefnið standi yfir í eitt ár, það hófst á vormánuðum 2026 og lýkur í apríl 2027. Lokaafurðin á að vera varanlegur og lifandi samstarfsvettvangur fyrir nýsköpun á Suðurlandi sem styrkir samvinnu milli atvinnulífs og fræðasamfélagsins á svæðinu.