Atkvæðin í sveitarstjórnarkosningunum í Hrunamannahreppi voru endurtalin í gær eftir að D-listi Sjálfstæðismanna og óháðra hafði óskað eftir því að vafaatkvæði yrðu endurmetin.
Eftir talningu á laugardagskvöld hafði D-listinn fengið 330 atkvæði og þrjá fulltrúa kjörna og L-listinn 170 atkvæði og tvo menn kjörna. Aðeins hefði þurft fjögurra atkvæða sveiflu til þess að D-listinn næði inn fjórða fulltrúanum og væri þá með fjóra af fimm sveitarstjórnarfulltrúum í hreppnum.
Kjörstjórn varð við beiðni um endurtalningu og kom í ljós að eitt atkvæði hafði verið rangt flokkað, þar sem atkvæði til L-listans leyndist í bunka með atkvæðum D-listans.
Samkvæmt upplýsingum frá umboðsmönnum D-listans var kjörstjórn klofin í afstöðu sinni til vafaatkvæðanna sem D-listinn hafði gert athugasemdir við, en atkvæðin voru að lokum áfram talin ógild og því breyttist niðurstaða kosninganna ekki.
Endanleg niðurstaða í Hrunamannahreppi varð því sú að D-listinn fékk 329 atkvæði, 65,8% og þrjá menn kjörna og L-listinn 171 atkvæði, 34,2% og tvo menn kjörna.