Ásahreppur gerir áfram vel við íbúa sína

Stefnt er að því að allir aðalvegir í Ásahreppi verði með bundnu slitlagi í haust og fyrirhugað er að leggja ljósleiðara um hreppinn á næstunni.

Undanfarið hefur verið unnið að því að leggja slitlag á þá vegi sem skildir voru eftir í átaki sem ráðist var í 1996 til 1998. Þá voru nokkrir vegir skildir eftir vegna þess að ekki var föst búseta á viðkomandi bæjum.

Að sögn Eydísar Þ. Indriðadóttur, oddvita Ásahrepps, eru horfur á að verkinu verði lokið í haust. Á sama tíma er Ásahreppur að skoða möguleika á að leggja ljósleiðara í öll íbúðahús í hreppnum.

Að sögn Eydísar er fyrirhugað að leggja ljósleiðarann á næstu þremur árum og hefur hreppurinn verið að leitast eftir kostnaðarmati.

Ekki liggur fyrir hvort sveitarfélagið greiðir kostnaðinn að öllu leyti eða hvort íbúar borga einhvern hluta hans.