Framfaralistinn mun bjóða fram í annað sinn í Flóahreppi í komandi sveitarstjórnarkosningum. Árni Eiríksson, oddviti Flóahrepps, skipar 1. sæti listans og í 2. sæti er Hulda Kristjánsdóttir, sveitarstjóri.
Framfaralistinn hlaut þrjá fulltrúa kjörna í síðustu kosningum og hefur setið í meirihluta sveitarstjórnar á yfirstandandi kjörtímabili.
Í tilkynningu frá listanum segir að samstarf fulltrúa í sveitarstjórn hafi verið afar gott. Markvisst hafi verið unnið að því að styrkja rekstur, uppbyggingu og þjónustu sveitarfélagsins en reksturinn hafi verið jákvæður þrátt fyrir umtalsverðar fjárfestingar í innviðum.
„Framkvæmdir og uppbygging innviða hafa verið í brennidepli. Hönnun viðbyggingar við Flóaskóla er á lokastigi og stefnt er að því að hefja framkvæmdir strax í sumar og mun bygging skólahúsnæðis standa yfir á hluta næsta kjörtímabils. Þá er uppbygging íbúðahverfis við Þingborg komin af stað en fyrirhugað er að úthluta fyrstu 20 lóðunum í sumar í nýju, 60 íbúða hverfi sem markar upphaf skipulagðrar þéttbýlismyndunar á vegum sveitarfélagsins sjálfs,“ segir í tilkynningu framboðsins og því bætt við að Framfaralistinn hyggist byggja áfram á þessum trausta grunni en listinn sé skipaður fjölbreyttum hópi fólks með víðtæka reynslu og þekkingu.
Listinn í heild sinni:
1. Árni Eiríksson, teymisstjóri og oddviti sveitarstjórnar
2. Hulda Kristjánsdóttir, sveitarstjóri og sveitarstjórnarfulltrúi
3. Walter Fannar Kristjánsson, laganemi og sveitarstjórnarfulltrúi
4. Hrafhildur H. Guðmundsdóttir, reiðkennari og sérfræðingur
5. Hjalti Guðmundsson, húsasmíðameistari, kennari og sveitarstjórnarfulltrúi
6. Sveinn Orri Einarsson, vélfræðingur
7. Sigrún Hrefna Arnardóttir, kjólaklæðskeri og ferðaþjónustubóndi
8. Sigurjón Reynisson, nemi í rafvirkjun
9. Helena Hólm, hársnyrtimeistari og ferðaþjónustubóndi
10. Stefán Geirsson, bóndi