Arndís stefnir á fyrsta sætið

Arndís Soffía Sigurðardóttir, varaþingmaður Vinstri grænna í Suðurkjördæmi, sækist eftir 1. sæti á framboðslista VG í kjördæminu fyrir komandi alþingiskosningar.

„Ég býð fram krafta mína til að leggja öllum þeim lið sem vinna að því að gera Ísland að réttlátara og heiðarlegra samfélagi. Ég hef talsvert setið á þingi sem varaþingmaður á yfirstandandi kjörtímabili og hef átt prýðilegt samstarf við þingmenn í öllum flokkum en mér hefur þótt leitt að horfa uppá það hver djúpir skurðir hafa verið grafnir á milli þingflokka og einmitt á þeim tímum þegar hve mest ríður á að við stöndum saman,“ segir í fréttatilkynningu frá Arndísi.

Arndís rekur ferðaþjónustufyrirtæki í Fljótshlíð ásamt fjölskyldu sinni. Hún er lögreglumaður og lögfræðingur að mennt en er í leyfi frá störfum sem fulltrúi sýslumanns á Selfossi á meðan hún gegnir formennsku fyrir starfshópi sem innanríkisráðherra skipaði til að fjalla um hin svokölluðu Guðmundar- og Geirfinnsmálin.