Arndís Soffía fer yfir Guðmundar- og Geirfinnsmálin

Arndís Soffía Sigurðardóttir, lögfræðingur og varaþingmaður VG í Smáratúni í Fljótshlíð, hefur verið skipuð formaður starfshóps sem fer yfir Guðmundar- og Geirfinnsmálin.

Ögmundur Jónasson, innanríkisráðherra, kynnti starfshópinn í dag en honum er ætlað að fara yfir málið í heild sinni en sérstaklega þá þætti sem snúa að rannsókn þess og framkvæmd rannsóknarinnar.

Fram kom á blaðamannafundi í dag, að almenningur hafi látið sig Guðmundar- og Geirfinnsmál varða. Þannig hafi Ögmundur fengið í hendur 1.190 undirskriftir þar sem skorað er á ráðherra að beita sér fyrir endurupptöku Guðmundar- og Geirfinnsmála, sem og rannsókn á vinnubrögðum þeirra sem fóru með rannsókn málanna.

Innanríkisráðuneytið segir, að þau gögn, sem hafi komið hafa fram á síðustu misserum og árum, verði tekin til athugunar í skoðun starfshópsins. Í áfangaskýrslu eigi að koma fram hvort og þá til hvaða ráðstafana þurfi að grípa varðandi framhalds málsins.

Starfshópurinn muni geta kallað sérfræðinga til ráðgjafar eftir því sem hann telji þörf á. Starfshópurinn skal skila ráðherra áfangaskýrslu fyrir lok apríl á næsta ári.

Arndís Soffía er lögfræðingur, með próf frá Lögregluskóla ríkisins og hefur starfað sem lögreglumaður og varðstjóri. Hún starfar nú sem fulltrúi hjá sýslumannsembættinu á Selfossi. Auk hennar skipa hópinn Haraldur Steinþórsson, lögfræðingur og Jón Friðrik Sigurðsson, yfirsálfræðingur á geðsviði Landspítala. Þá starfar með hópnum Valgerður María Sigurðardóttir, lögfræðingur í innanríkisráðuneyti.