Bæjarráð Árborgar hefur falið Braga Bjarnasyni, menningar- og frístundafulltrúa sveitarfélagsins, að kanna hversu mikill kostnaður er við að skipta út gúmmíkurli á sparkvöllum í Árborg.
Arna Ír Gunnarsdóttir, S-lista, lagði fram fyrirspurn á fundi bæjarráðs í morgun þessa efnis.
Í Árborg eru fimm sparkvellir/knattspyrnuvellir þar sem notað er endurunnið dekkjagúmmí. Í fyrirspurn Örnu segir að undanfarin ár hafi verið mikil umræða um heilsuspillandi áhrif þess að slíkt gúmmí sé notað á slíkum völlum.
„Vegna þessa óska ég eftir að það verði skoðað hvað það felur í sér mikla kostnaðaraukningu að skipta út því endurunna dekkjagúmmíi, sem notað er í dag í sveitarfélaginu, í umhverfisvænt gúmmí,“ segir Arna Ír í fyrirspurninni.
Bæjarráð vísaði fyrirspurninni til Braga frístundafulltrúa.