Ari Sigurðsson hefur verið ráðinn í stöðu framkvæmdastjóra fjármála við Heilbrigðisstofnun Suðurlands frá 1. september næstkomandi til 5 ára.
Hann tekur við starfinu af Þorbjörgu Guðnadóttur sem nú er tímabundið settur framkvæmdastjóri fjármála hjá HSU. Ari var valinn úr hópi fjórtán umsækjenda. Hann er fæddur árið 1962 og lauk námi í viðskiptafræði (Cand.Oecon) frá Háskóla Íslands árið 1987 og MBA gráðu frá Norwegian Business School, BI Oslo árið 1993.
Síðustu fimm ár hefur hann starfað sem fjármálastjóri Fjármálaeftirlitsins en hann hefur áður unnið sem sérfræðingur við fjárlagaskrifstofu fjármála- og efnahagsráðuneytisins og sem deildarstjóri hjá Sparisjóðabanka Íslands, Glitni og Íslandsbanka og framkvæmdastjóri fjármálasviðs Myllunnar-Brauðs, svo eitthvað sé nefnt.
Vegna tengsla við nokkra umsækjendur tilkynnti Herdís Gunnarsdóttir, forstjóri HSU heilbrigðisráðuneytinu um vanhæfi sitt til að taka ákvörðun um ráðningu í starfið og var Jóhanna F. Jóhannesdóttir, forstjóri Heilbrigðisstofnunar Vesturlands sett að af hálfu heilbrigðisráðuneytisins, sem forstjóri HSU til að undirbúa og taka ákvörðun um ráðningu í starfið.