Arðsemi hamingjunnar á landsbyggðinni

Á morgun, laugardag, kl. 13-17 heldur Félag kvenna í atvinnulífinu ráðstefnuna Arðsemi hamingjunnar á landsbyggðinni – Ný heimssýn á nýjum tímum, þar sem fjallað verður um ríkidæmi landsbyggðarinnar. Ráðstefnan verður haldin á Zoom.

Meðal þeirra sem flyja erindi eru Auður I. Ottesen, Ingunn Jónsdóttir, Laufey Sif Lárusdóttir, Arnheiður Jóhannsdóttir og Sigrún Davíðsdóttir. Sigurður Ingi Jóhannsson, samgöngu- og sveitarstjórnarráðherra flytur opnunarávarp og ráðstefnustjóri er Laufey Guðmundsdóttir.

Hver eru tækifæri landsbyggðarinnar? Hvernig tökumst við á við breyttan veruleika? Hver er vegferð frumkvöðuls, hindranir, árangur og hvert er sunnlenska-módelið? Fjallað verður um sjálfbærni, nýsköpun, úthýsingu starfa, skapandi markaðssetningu, nándina í fjarlægðinni – og hvað svo? Af hverju fækkaði íbúum London um 10% í fyrra? Eru litlir bæir að endurheimta sinn fyrri sjarma?

Covid hefur sannað að fólk getur sett lífsgæðin í forgang, flutt starfið með sér á sinn drauma búsetustað eða skapað tækifæri hvar sem er á landinu. Íbúum stórborga í Evrópu hefur fækkað undanfarið ár og smærri borgir og bæir hafa endurheimt sinn fyrri sjarma.

Í tilkynningu frá FKA segir að um sé að ræða gífurlega mikilvægt byggðamál og tækifæri til að halda landinu í byggð. Til að vel takist til er nauðsynlegt að styrkja samfélög á landsbyggðinni og bjóða upp á öfluga grunnþjónustu fyrir íbúa. Tækifærin á landsbyggðinni eru óteljandi og þurfa störf án staðsetningar einungis tvennt: nettengingu og samgöngur.

Landsbyggðadeildir Félags kvenna í atvinnulífinu FKA tóku höndum saman um ráðstefnuna þar sem skautað verður yfir sviðið og rædd tækifæri í takt við þessa nýju heimssýn á nýjum tímum.

Smelltu hér til að tengjast ráðstefnunni