Markaðsstofa Suðurlands veitir árlega viðurkenningar fyrir Sprota ársins og Framlag ársins í ferðaþjónustu á Suðurlandi.
Viðurkenningar ársins 2026 voru veittar á aðalfundi Markaðsstofunnar á Stracta Hóteli á Hellu í síðustu viku og komu í hlut Arctic Trailblazers og Kristínar Jóhannsdóttur.
Arctic Trailblazers á Flúðum er Sproti ársins en fyrirtækið hefur á skömmum tíma vakið athygli fyrir spennandi og vandaðar ævintýraferðir á Suðurlandi. Þau Eva Sæland og Óskar Sigurðsson sem eiga og reka fyrirtækið hafa ekki aðeins aukið fjölbreytni í ferðaþjónustu á svæðinu, heldur líka styrkt ímynd Suðurlands sem áfangastaðar fyrir þá sem leita að ævintýrum og nýrri upplifun. Fyrirtækið hefur þróað einstaka upplifun þar sem ferðalangar fá að njóta náttúrunnar á nýjan og kraftmikinn hátt, meðal annars með snjóhjóla- og enduro ferðum.
Kristín Jóhannsdóttir, safnstjóri Eldheima í Vestmannaeyjum, hlaut síðan viðurkenningu fyrir framlag til ferðaþjónustu. Kristín var ráðin til Vestmannaeyjabæjar árið 2004 sem ferða-, menningar- og markaðsfulltrúi og nýtti þar öflugt tengslanet sitt til að kynna Eyjarnar á erlendum vettvangi. Hún átti stóran þátt í að móta þá sýn að Vestmannaeyjar yrðu kynntar sem „Pompei Norðursins“, sem síðar varð kveikjan að uppbyggingu Eldheima. Frá opnun Eldheima árið 2014 hefur Kristín gegnt lykilhlutverki sem safnstjóri og byggt upp safnið sem einn af mikilvægustu áfangastöðum landsins.