Stjórnir Arctic Adventures hf. og Kynnisferða hf. (Icelandia) hafa undirritað samkomulag um helstu skilmála vegna áforma um sameiningu félaganna.
Samkomulagið er gert með fyrirvara um áreiðanleikakönnun á báðum félögum, samþykki Samkeppniseftirlitsins og samþykki hluthafafunda félaganna. Gert er ráð fyrir að áreiðanleikakönnun og kaupsamningsgerð ljúki fyrir áramót.
Arctic Adventures rekur vinsæla áfangastaði á borð við Fjaðrárgljúfur, Kerið, Into the Glacier á Langjökli og Raufarhólshelli auk þess að reka hótel og gististaði ásamt ferðabílaleigunni Happy Campers. Kynnisferðir, sem starfar undir vörumerkinu Icelandia, er eitt rótgrónasta og fremsta ferðaþjónustufyrirtæki landsins með þekkt vörumerki á borð við Reykjavik Excursions, Flybus, Icelandic Mountain Guides og Dive.is, auk þess að sinna almenningssamgöngum og flutningum.
„Með sameiningu þessara tveggja rótgrónu félaga verður til öflugt ferðaþjónustufyrirtæki með afar breitt þjónustuframboð. Sameinað félag verður leiðandi afl í fjárfestingum, uppbyggingu og þróun íslenskrar ferðaþjónustu um land allt og styrkir þannig samkeppnisstöðu greinarinnar gagnvart alþjóðlegum ferðaþjónusturisum,” segir Ásgeir Baldurs, forstjóri Arctic Adventures.
Björn Ragnarsson, forstjóri Icelandia, tekur undir þetta og segir samrunann „sameiginlegt tækifæri til að byggja upp framtíð íslenskrar ferðaþjónustu með fólkið okkar í fararbroddi. Starfsfólk beggja fyrirtækja býr yfir dýrmætri reynslu og ástríðu fyrir að skapa einstaka upplifun fyrir gesti okkar. Með því að sameina krafta, þekkingu og metnað getum við nýtt tækni og nýsköpun til að efla sjálfbæra ferðaþjónustu, skapa fleiri tækifæri, og styrkja Ísland sem leiðandi áfangastað í alþjóðlegri samkeppni,“ segir Björn.
Ráðgjafar Arctic Adventures eru ARMA Advisory og LOGOS lögmannsþjónusta. Arctica Finance og BBA // Fjeldco eru ráðgjafar Icelandia.