Arctic Adventures hefur keypt allt hlutafé í Kerfélaginu af Óskari Magnússyni, Ásgeiri Bolla Kristinssyni, Sigurði Gísla Pálmasyni og Jóni Pálmasyni, sem áttu hver sinn fjórðungshlut. Helsta eign Kerfélagsins er Kerið í Grímsnesi sem hefur lengi verið vinsæll áningarstaður ferðamanna, rómað fyrir náttúrufegurð og jarðfræðilega sögu.
Arctic Adventures er eitt rótgrónasta og öflugasta ferðaþjónustufyrirtæki landsins. Fyrirtækið býður upp á fjölbreyttar afþreyingarferðir um land allt þar sem lögð er áherslu á gæði og öryggi. Stefna Arctic Adventures er að bjóða upp á sjálfbæra og vistvæna ferðaþjónustu í sátt við nærsamfélagið. Meðal þeirra ferðamannastaða sem félagið kemur að rekstri á má nefna Raufarhólshelli og Ísgöngin Into the Glacier í Langjökli.
„Kerið er með merkilegustu náttúruperlum landsins. Við teljum að góðir möguleikar séu til staðar til frekari uppbyggingar við svæðið og jafnframt áframhaldandi náttúruverndar. Kerið er í alfaraleið og aðgengilegt til lengri eða skemmri skoðunarferða. Við fögnum því að hafa náð samningum um þessi kaup og hyggjumst vanda þar til uppbyggingar. Arctic Adventures á allt undir þegar kemur að náttúruvernd og því skiptir góð umgengni um náttúruna okkur gríðarlega miklu máli,“ segir Ásgeir Baldurs forstjóri Arctic Adventures.
Stofna sjóð um sjálfbæra náttúruvernd
Óskar Magnússon, stjórnarformaður Kerfélagsins, segir að allt hafi sinn tíma en Kerfélagið hefur átt Kerið í 23 ár og nú sé komið að næsta kaflu uppbyggingar á svæðinu.
„Við töldum það heppilegan tíma til að láta staðar numið svo nýir eigendur geti byggt upp til frambúðar eftir sínum hugmyndum. Arctic Adventures er traust og burðugt félag sem mun án efa standa myndarlega að framhaldinu við Kerið. Við fjórmenningarnir höfum á þessum tímamótum ákveðið að stofna sérstakan sjóð sem styrkja mun sjálfbæra náttúruvernd í þeim anda sem reynst hefur farsæl við uppbyggingu Kersins,“ segir Óskar.
„Við erum búin að eiga einstakt samstarf við bændurna á Miðengi í Grímsnesi og aðra nágranna okkar á svæðinu. Það er eindregin skoðun okkar og reynsla, að starfsemi af þessu tagi sé best fyrir komið með öflugri þátttöku heimamanna eins og við höfum borið gæfu til að njóta,“ bætis Óskar við að lokum.