Sveitarfélagið Árborg mun reyna að halda gangandi eins mikilli þjónustu sveitarfélagsins og mögulegt er á hverjum tíma þrátt fyrir samkomubann og hugsanleg veikindi eða sóttkví starfsfólks.
Horft er til þess að draga úr smithættu meðal almennings og vernda lykilstarfsmenn frá sóttkví eða veikindum.
Eins og fram hefur komið fellur allt skólastarf niður, bæði í leik- og grunnskólum, mánudaginn 16. mars en dagurinn verður nýttur af stjórnendum og starfsfólki til endurskipulagningar starfsins. Nánari upplýsingar um breytingu á skipulagi skóla- og frístundastarfs verða sendar út mánudaginn 16. mars.
Hægt að ná í starfsfólk í síma og tölvupósti
Ráðhús Árborgar verður lokað og þjónustumiðstöðin Austurvegi 67 sömuleiðis. Hægt er að ná í starfsmenn sveitarfélagsins í síma 480 1900 í ráðhús og 480 1500 á Austurvegi 67 og einnig með tölvupósti á netfangið radhus@arborg.is og einnig eru upplýsingar um netföng starfsfólks á heimasíðu Árborgar.
Bókasöfnin og sundlaugar opin
Reynt verður að halda eðlilegri starfsemi á bókasöfnum sveitarfélagsins á Selfossi, Eyrarbakka og Stokkseyri en lögð er áhersla á að gestir haldi sig í hæfilegri fjarlægð hverjir frá öðrum og gæti hreinlætis á höndum.
Einnig verður gámasvæði Árborgar opið og gert er ráð fyrir óbreyttri sorphirðu og vetrarþjónustu.
Leitast verður við að halda úti eðlilegri starfsemi bæði í Sundhöll Selfoss og Stokkseyrar en talið verður inn í húsnæðið og áhersla lögð á að gestir haldi sig í hæfilegri fjarlægð hver frá öðrum og sinni vel handþvotti.
Aukin áhersla á símaviðtöl í félagsþjónustu
Hvað varðar velferðarþjónustu þá verður aukin áhersla á símaviðtöl í barnavernd og félagsþjónustu. Þeir íbúar sem eru á fjárhagsaðstoð geta sent tölvupóst á netfangið hekla.dogg@arborg.is, eða haft samband í síma í stað þess að mæta í Ráðhúsið v/stimplunar.
Opið er í Árbliki og Vinaminni. Þeir notendur sem eru með undirliggjandi sjúkdóma eru hvattir til að hugleiða vel hvort þeir eigi að taka þátt í starfinu eður ei.
Takmarkaðar gestakomur í Grænumörk
Í Grænumörkinni hefur tíukaffið nú þegar verið slegið af. Húsið í Grænumörk er að mestu lokað fyrir utanaðkomandi en að sjálfsögðu opið fyrir íbúa. Þannig er leitast við að takmarka flæði í gegnum húsið. Aðstandendur geta þó enn komið í heimsóknir. Félag eldri borgara hefur hætt með allt félagsstarf í bili.
Verslun VISS í Gagnheiði er lokuð og verður svo um óákveðinn tíma til að takmarka heimsóknir. Þeir sem ætla að færa VISS efnivið til að vinna úr eru beðnir um að geyma það þar til í vor.
Hér má sjá nánari upplýsingar um þjónustu Árborgar í samgöngubanni