Sveitarfélagið Árborg fékk 3,5 milljón króna styrk úr Sprotasjóði leik-, grunn- og framhaldsskóla á dögunum fyrir verkefnið Mál skiptir máli.
Verkefnið miðar að því að efla málþroska leikskólabarna með markvissri málörvun bæði innan leikskólans og á heimilum þeirra. Lögð er áhersla á að styrkja foreldra í uppeldishlutverki sínu með fræðslu og notendavænum verkfærum sem auðvelt er að nýta í daglegu lífi með börnum.
Með fræðsluerindum, aðgengilegu málörvunarefni og auknu samstarfi leikskóla og heimila er stuðlað að samfelldri málörvun, auknu sjálfstrausti foreldra og jöfnum tækifærum barna til málþroska.
Alls var úthlutað tæpum 64,4 milljónum króna úr Sprotasjóð til tuttugu skólaþróunarverkefna fyrir skólaárið 2026–2027 og var Mál skiptir máli eina verkefnið á Suðurlandi sem hlaut styrk.