Árbakki á Selfossi var valin fallegasta gatan í Árborg í ár en verðlaunin voru afhent síðdegis í dag á bæjarhátíðinni Sumar á Selfossi.
Íbúar götunnar komu saman ásamt fulltrúum bæjaryfirvalda, elsti og yngsti íbúi götunnar fengu blómvendi, þær Þórey Rún Magnúsdóttir og Lára Davíðsdóttir. Lára er nýlega flutt í götuna og var skiljanlega ánægð með þessar góðu móttökur.
Að því loknu afhjúpaði Ari Björn Thorarensen, forseti bæjarstjórnar, skilti á götuhorninu þar sem fram kemur að gatan sé sú fallegasta í Árborg í ár.
Íbúar Árbakka taka virkan þátt í Sumar á Selfossi með því að skreyta götuna og ættu áhugasamir að kíkja þangað og skoða skreytingarnar.