Veðurstofan hefur gefið út appelsínugula viðvörun sem gildir frá kl. 12-15 á morgun, föstudaginn 10. janúar.
Gert er ráð fyrir austan hríðarveðri með vindhraða á bilinu 18 til 25 m/s. Einnig er spáð talsverðri eða mikilli snjókomu með lélegu skyggni og versnandi akstursskilyrðum. Búast má við samgöngutruflunum og lokunum á vegum.
Fólki bent á að sýna varkárni og fylgjast með veðurspám. Ekkert ferðaveður er á meðan appelsínugula viðvörunin er í gildi.
Þegar líður á daginn dregur úr vindi en viðvörunarstigið er lækkað niður í gult milli kl. 15 og 20. Þá verður suðaustan og sunnan hvassviðri eða stormur, 15-23 m/sek og hvassast við ströndina. Aðstæður verða varasamar fyrir ökutæki sem taka á sig mikinn vind. Afmarkaðar samgöngutruflanir eru líklegar og lokanir á vegum. Fólk er hvatt til að sýna aðgát og ganga frá lausum munum til að forðast tjón.