Veðurstofan hefur gefið út appelsínugula viðvörun fyrir Suðurland sem gildir á milli klukkan 12 og 20 á mánudag, vegna austan storms og snjókomu. Gular viðvaranir eru í gildi á milli klukkan 7 og 12 og frá 20 til miðnættis.
Á Suðausturlandi gildir appelsínugul viðvörun frá klukkan 11 til 23.
Reiknað er með austan 20-28 m/sek og vindhviðum staðbundið yfir 40 m/sek. Snjókoma eða slydda og skafrenningur með versnandi færð og ekkert ferðaveður. Einnig eru líkur á foktjóni og er fólk hvatt til að huga að lausamunum.
Undir kvöld fer að rigna en áfram verða snarpar vindhviður og búast má við hríðarveðri á fjallvegum og varasömu ferðaveðri.
Á Suðausturlandi verður hvassast vestan Öræfajökuls, talsverð snjókoma eða slydda með versnandi færð, en sums staðar rigning við ströndina. Ekkert ferðaveður verður á þessu svæði.