Lyfsala verður opnuð á Flúðum við hlið nýrrar heilsugæslu síðar á árinu. Samningur hefur verið undirritaður milli eigenda Apóteks Suðurlands og Hrunamannahrepps um leigu á húsnæðinu að Hrunamannvegi 3 sem er í eigu sveitarfélagsins.
Opnunartími lyfjaafgreiðslunnar verður sá sami og heilsugæslunnar, sem tryggir notendum bestu mögulegu þjónustu. Í tilkynningu frá Hrunamannahrepp segir að mikil ánægja sé með fyrirhugað samstarf, opnun lyfjaafgreiðslu í uppsveitum Árnessýslu sé afar ánægjuleg staðreynd og styrkir enn frekar búsetuskilyrði á svæðinu.
Aldís Hafsteinsdóttir, sveitarstjóri, lýsti einnig við undirritunina sérstakri ánægju með að Apótek Suðurlands, sem er sjálfstætt starfandi apótek með rekstur á Selfossi, væri tilbúið í verkið en það er í eigu öflugra kvenna af Suðurlandi.