Lögreglumenn frá Selfossi höfðu í dag afskipti af nokkrum eigendum ökutækja í Hveragerði sem höfðu lagt bifreiðum sínum þannig að hluti þeirra var á gangstétt og hömluðu þannig för gangandi og sérstaklega þeirra sem eru á ferð með barnavagn eða í hjólastól.
Bíleigendur eru hvattir til að leggja ekki ökutækjum sínum á gangstéttum. Lögregla mun fylgjast með lagningu ökutækja á næstunni og þeir sem reynast brotlegir verða sektaðir.
Einnig mun verða fylgst með ökuhraða í þéttbýlisstöðum. Á Laugarvatni var einn ökumaður kærður í dag fyrir hraðakstur í þéttbýlinu og hann sektaður á staðnum.
Auk þessa hafa lögreglumenn haft afskipti af fjölda ökumanna í tengslum við ljósabúnað bifreiða og eftirvagna.