Mikið annríki hefur verið hjá lögreglunni á Suðurlandi um helgina í öllu umdæminu. Fjórir gistu fangaklefa á Selfossi í nótt.
Talsverð ölvun var á Kótelettuhátíðinni á Selfossi í nótt og töluvert af ungmennum undir lögaldri sem reyndu að komast inn á svæðið með fölsuðum skilríkjum eða skilríkjum annarra.
Eftir nóttina voru fjórir sem gistu fangaklega, þar af tveir fyrir meiriháttar eignaspjöll og einn fyrir ölvun á almannafæri og ofbeldi gagnvart lögreglumanni. Þá barst ein tilkynningum um heimilisofbeldi og gisti einn í fangaklefa sökum þess. Öll málin eru í rannsókn.
Einnig voru tilkynnt þrjú kynferðisbrot á svæðinu og eru þau til rannsóknar hjá lögreglunni á Suðurlandi.
Búist er við mikilli umferð á Suðurlandi í dag og hvetur lögregla ökumenn til að fara varlega. Lögreglan verður með bíl á tjaldsvæði Kótelettunnar og mælist til þess að ökumenn komi við og blási áður en þeir leggja af stað.