Lögreglan á Suðurlandi hefur haft í nógu að snúast síðasta sólarhringinn. Núna er stór ferðahelgi, margir eru á ferðinni og lögregla hvetur fólk til að fara varlega í umferðinni.
Í nótt kom beiðni um aðstoð vegna manns sem ekki hefði skilað sér heim úr bílferð norðan við Laugarvatn og höfðu aðstandendur áhyggjur af honum. Lögregla óskaði meðal annars eftir aðstoð Björgunarsveitarinnar Ingunnar við leit og fannst maðurinn rétt fyrir klukkan 8 í morgun þar sem hann var fótgangandi. Hafði hann fest bifreið sína á Hlöðuvallavegi og ekki náð símasambandi til að kalla eftir aðstoð.
Ekið var á gangandi vegafaranda við verslunarkjarna í Vík í Mýrdal um klukkan níu í morgun en meiðsli hans voru minniháttar.
Rúmum klukkutíma síðar varð tveggja bíla árekstur skammt vestan Hvolsvallar. Lögregla, sjúkraflutningar HSU og tækjabíll frá Brunavörnum Rangárvallasýslu fóru á vettvang en þarna fór betur en á horfðist og voru slys á fólki minniháttar.
Laust fyrir hádegi varð svo annar árekstur á Laugarvatnsvegi við Reykjaveg, þar sem tveir bílar skullu saman og valt annar bíllinn. Að minnsta kosti sex manns voru í bílunum tveimur en meiðsli fólksins voru minniháttar.
Þá hafnaði bíll utan vegar á gatnamótum Suðurlandsvegar og Reynishverfisvegar í dag og þar voru tveir aðilar fluttir með sjúkrabifreið til aðhlynningar á Heilbrigðisstofnun Suðurlands.
Tildrög allra þessara umferðarslysa eru í rannsókn hjá lögreglunni á Suðurlandi.