Annan daginn í röð kviknaði eldur í sama fjölbýlishúsinu við Fossveg á Selfossi, að þessu sinni í ruslageymslu.
Neyðarlínan fékk tilkynningu um eldinn um klukkan hálf fjögur í dag og fór fjölmennt lið viðbragðsaðila á vettvang.
Reykkafarar fóru inn í ruslageymsluna og réðu niðurlögum eldsins á skammri stund.
Ekki náðist í lögregluna á Suðurlandi við vinnslu fréttarinnar en hún mun hafa eldsupptökin til rannsóknar.
Í gærmorgun var tilkynnt um eld í geymslu í sama húsi og barst þá talsverður reykur um kjallara hússins og upp á efri hæðir.
