Þessa stundina er talsvert björgunarlið við slökkvistörf í sumarhúsahverfi við Merkurlaut á Skeiðum en um klukkan hálf fjögur barst útkall til Brunavarna Árnessýslu um gróðureld á svæðinu.
Litlu mátti muna að eldur næði að læsa sér í sumarbústað á svæðinu en það tókst að koma í veg fyrir það. Eldsupptök voru þau að verið var að vinna með slípirokk utandyra.
Þetta er annað útkallið í dag þar sem slökkva þarf eld í þurrum gróðri í Árnessýslu en í morgun var slökktur eldur við Kolgrafarhól í Grímsnesi. Brunavarnir Árnessýslu ítreka beiðni sína til fólks að fara varlega með eld og aðra hitagjafa utandyra í þessari þurrkatíð sem nú er.
