Nýi leikskólinn sem er í byggingu á Hvolsvelli fær nafnið Aldan. Þetta er niðurstaða nafnasamkeppni en í hana bárust margar góðar og fjölbreyttar hugmyndir.
Valnefnd fór yfir allar hugmyndirnar en í henni sátu þau Angelia Fjóla Vilhjálmsdóttir, Ágúst Leó Sigurðsson og Sólbjört Sigríður Gestsdóttir. Nefndin var samhljóma um að nafnið Aldan myndi henta vel fyrir nýja leikskólahúsnæðið. Hugmyndin að nafninu kom frá Önnu Þorsteinsdóttur og afhenti Sólbjört Sigríður Gestsdóttir leikskólastjóri henni viðurkenningu fyrir.
Fyrst um sinn, frá árinu 1973, hét dagvistunin Leikskólinn á Hvolsvelli en árið 1993 færðist starfsemin í nýtt húsnæði og fékk þá nafnið Örk sem vísaði í hönnun byggingarinnar. Örkin mun standa áfram og mun húsnæðið að öllum líkindum verða nýtt í aðra starfsemi.
Nefndinni fannst því tilvalið að nýtt húsnæði fengi nýtt nafn og varð Aldan fyrir valinu vegna öldunnar á Hvolsvelli sem íbúar þekkja vel. Valnefndinni þótti nafnið tilvalið, þar sem deildir leikskólans munu heita eftir örnefnum úr sveitafélaginu og álmur eftir fjöllum úr sveitafélaginu.