Anna Björnsdóttir, menningarfrömuður í Mýrdalshreppi, var ein þeirra sem forseti Íslands sæmdi heiðursmerki hinnar íslensku fálkaorðu við hátíðlega athöfn á Bessastöðum í dag.
Orðuna fær Anna fyrir störf að mennta-, menningar- og félagsmálum í heimabyggð.
Anna, sem er fyrrverandi skólastjóri Víkurskóla, hefur komið víða við í menningarstarfi Mýrdalshrepps síðustu áratugina, sem ötul tónlistarkona, tónskáld og kórstjóri. Hún hafði frumkvæðið að því að safnað yrði fyrir flygli fyrir Tónskóla Mýrdalshrepps, sem nú er hjartað í skólastarfinu og í dag stjórnar hún Syngjandi, kór eldri borgara í Mýrdalnum.
Meðal annarra orðuhafa voru Ásdís Thoroddsen, leikstjóri, Hákon Ingvi Hansson, dýralæknir, Karólína Elísabetardóttir, bóndi í Hvammshlíð í Austur-Húnavatnssýslu, Ólafur Arnalds, jarðvegsfræðingur og Ólafur Ólafsson, fyrirliði Íslandsmeistara Grindavíkur í körfubolta.
