Anna Rut og Arnar Snær fengu styrk

Tuttugu og fjórir afburðanemendur úr framhaldsskólum víðs vegar af landinu tóku nýlega við styrkjum úr Afreks- og hvatningarsjóði stúdenta Háskóla Íslands við hátíðlega athöfn á Háskólatorgi.

Í þessum hópi voru Arnar Snær Ágústsson, stúdent frá Menntaskólanum að Laugarvatni og Anna Rut Arnardóttir, stúdent frá Fjölbrautaskóla Suðurlands. Arnar Snær hyggur á nám í læknisfræði við Háskóla Íslands á komandi hausti en Anna Rut stefnir á vélaverkfræði, sömuleiðis við HÍ.

Afreksstyrkurinn er veittur nemendum sem eiga það sameiginlegt að hafa náð framúrskarandi árangri á stúdentsprófi. Hver styrkur nemur 300 þúsund krónum en auk þess er greitt skráningargjald í skólann sem er 60 þúsund krónur.