Lokakeppni Stóru upplestrarkeppninnar í Árborg var haldin í Sunnulækjarskóla fimmtudaginn 23. mars síðastliðinn. Undirbúningur fyrir keppnina hefur staðið frá degi íslenskrar tungu 16. nóvember.
Sigurvegari keppninnar í ár var Anna Metta Óskarsdóttir úr Vallaskóla, í öðru sæti varð Rán Ægisdóttir úr Sunnulækjarskóla og í þriðja sæti varð Kristrún Birta Guðmundsdóttir úr Barnaskólanum á Eyrarbakka og Stokkseyri.
Keppnin fór þannig fram að keppendur lásu þrisvar sinnum, í fyrstu umferð var lesið textabrot úr bókinni Víti í Vestmannaeyjum eftir Gunnar Helgason, næst voru lesin valin ljóð eftir Aðalstein Ásberg og í þriðju umferð lásu keppendur ljóð að sem nemendur völdu sjálfir.
Lokahátíðin er samstarfsverkefni grunnskólanna og Skólaþjónustu Árborgar með stuðningi frá Röddum sem áður héldu utan um keppnina á landsvísu. Á lokahátíðinni kepptu þrír fulltrúar frá hverjum skóla sem hafa verið valdir í forkeppnum í sínum skóla.
Í dómnefnd sátu Ingibjörg Einarsdóttir frá Röddum, formaður dómnefndar, Erna Ingvarsdóttir, kennari í Grunnskóla Hveragerðis og Hrund Harðardóttir, kennsluráðgjafi í Árborg.