Skeiða- og Hrunamannavegur er lokaður við Brúarhlöð eftir harðan árekstur tveggja bíla á sjöunda tímanum í kvöld. Þyrla Landhelgisgæslunnar var kölluð á vettvang og flutti hún tvo á Landspítalann.
Sex manns voru í bílunum tveimur og voru hinir fjórir fluttir minna slasaðir af vettvangi með sjúkrabílum. Í tilkynningu frá lögreglunni á Suðurlandi segir að að svo stökku sé ekki sé hægt að fullyrða um alvarleika meiðsla þeirra sem fluttir voru með þyrlunni.
Tækjabílar frá Brunavörnum Árnessýslu á Flúðum og í Reykholti voru kallaðir á vettvang en samkvæmt upplýsingum frá Vegagerðinni er brúin yfir Hvítá við Brúarhlöð ennþá lokuð.
Lögreglan á Suðurlandi rannsakar tildrög slyssins.