Laust fyrir kl. 10:30 í morgun voru lögregla og sjúkralið kölluð til á heilsugæslu HSU á Hvolsvelli vegna veiðimanns sem hafði orðið fyrir miklum bruna á fótum og kvið eftir að hafa fengið í gegnum sig háspennu.
Mjög löng veiðistöng mannsins mun hafa rekist upp í háspennulínu sem liggur yfir Eystri-Rangá, til móts við bæinn Minna-Hof og þannig leitt spennu niður stöngina og í gegnum manninn.
Maðurinn var fluttur með sjúkrabifreið á slysadeild Landspítalans í Fossvogi en frekari upplýsingar um líðan hans liggja ekki fyrir. Maðurinn er á sextugsaldri, erlendur ríkisborgari sem var í veiðiferð hér á landi.
Vettvangsvinnu er enn ólokið en rannsóknardeild lögreglunnar á Suðurlandi vinnur að rannsókn málsins.