Sænska tískuvöruverslunin Kappahl opnar dyrnar á Selfossi á morgun, laugardag, klukkan 12:00. Verslunin verður staðsett að Larsenstræti 5 á Selfossi, þar sem Lindex var áður til húsa.
Kappahl opnaði sína fyrstu verslun hérlendis í Smáralind síðastliðinn laugardag. Auk Selfoss mun Kappahl einnig opna verslun á Akureyri, Akranesi og Suðurnesjunum á morgun.
„Það er auðvitað dásamleg tilfinning að vera búin að opna Kappahl á Íslandi. Við erum lengi búin að fylgjast með Kappahl og Newbie og höfum dáðst að vörumerkinu, gildum þeirra og framtíðarsýn. Við erum sannfærð um að viðskiptavinir okkar verða alsælir með breytinguna. Það er líka sérstaklega ánægjulegt að geta nú boðið upp á vörulínu fyrir karla,“ segir Lóa Dagbjört Kristjánsdóttir, umboðsaðili Kappahl og Newbie á Íslandi, í samtali við sunnlenska.is.
Frábært starfsfólk stendur vaktina
Lóa segir að það hafi gengið vonum framar að standsetja verslunina á Selfossi. „Það hefur gengið hreint ótrúlega vel. Karen og Lára standa vaktina eins og þær hafi aldrei gert neitt annað, ásamt öllu sínu frábæra starfsfólki.“
Sjálf á Lóa sínar uppáhalds vörur frá Kappahl. „Ég elska gallabuxurnar. Þær eru ótrúlega klæðilegar og ekki verra að það sé hægt að fá short leg útgáfu af uppáhalds sniðinu sínu. Svo eru undirfötin algjör draumur, þau eru þægileg og gerð úr góðum efnum.“
Gott að geta verslað í heimabyggð
Lóa er mjög spennt fyrir morgundeginum en mikið húllumhæ verður á opnuninni; Leikhópurinn Lotta mun kíkja í heimsókn og Fríða Hansen og Alexander taka lagið. Einnig verða léttar veitingar í boði auk þess sem allir fá 20% afslátt sem skrá sig í Kappahl klúbbinn.
„Það er alltaf sérstök tilfinning að opna í heimabænum sínum. Bæði vegna þess að það er svo gaman að hitta alla, extra spenna yfir því að sýna öllu sínu fólki þessa flottu nýjung – og gleði yfir því að eiga möguleika að bjóða þeim upp á að versla í heimabyggð. Ég spegla mig mjög í því hvernig það er að búa úti á landi og þurfa alltaf að keyra í bæinn til að sækja allt.“
„Ég hlakka svo til að sjá alla og vil leggja áherslu á að karlarnir fái að koma með í verslunarleiðangur og finna loksins eitthvað fínt á sig hjá okkur,“ segir Lóa kát að lokum.
