Hin árlega osta- og brauðtertukeppni Kaffi Krúsar og Konungskaffi var haldin í miðbæ Selfoss í gær að viðstöddu fjölmenni.
Þetta er í þriðja sinn sem Kaffi Krús og Konungskaffi halda sameiginlega kökukeppni en hin geysivinsæla ostakökukeppni Kaffi Krúsar hófst fyrir tólf árum.
Alls tóku tólf keppendur þátt í keppninni og var heildarfjöldi kaka fimmtán talsins. Upphaflega stefndi í metfjölda keppenda og kaka, sem var svo ekki raunin þar sem þónokkuð var um forföll á síðustu stundu. Aldrei hafa fleiri karlmenn tekið þátt í kökukeppninni, eða alls tveir – og það var einmitt karlmaður sem átti bestu brauðtertuna.
Klassísk brauðterta og frumleg ostakaka
Hilmar Harðarson, matreiðslumeistari, átti bestu brauðtertu ársins 2026 með Karrý-lime-rækjutertu. Í umsögn dómnefndar segir meðal annars: „Einstaklega fallega skreytt brauðterta með matjurtum úr garði Hilmars. Hlutfall á milli brauðs og rækjusalats frábært. Klassísk brauðterta þar sem ferskleiki naut sín.“
Mina Stojanov átti svo bestu ostaköku árið 2026 með Baklava ostaköku, sem á rætur að rekja til Tyrklands. Í umsögn dómnefndar segir meðal annars: „Frumleg, falleg, bragðgóð ostakaka sem er skemmtilega öðruvísi.“
Í ár voru í fyrsta sinn veitt verðlaun fyrir fallegustu kökuna. Þau verðlaun hlaut Evgeniya Vaganova fyrir ostakökuna Allsber. Ostakakan var skreytt með ferskum berjum og þótti einstaklega falleg.
Formaður dómnefndar var Guðrún Hafsteinsdóttir en hún er vanur bragðsmakkari úr Kjörís. Með henni í dómnefnd sátu Daníel Ólafsson, Haukur Már Hauksson, Ida Sofia Grundberg, Valdimar Bragason, Þórhildur Guðbjörg Hjaltadóttir og Anna Margrét Magnúsdóttir. Þess má geta að Anna Margrét hefur unnið ostakökukeppnina þrisvar sinnum.
Vinningshafar fengu glæsileg verðlaunin frá Hótel Geysi, Hótel Kríu og Hótel Örk og fallegar ostakörfur frá MS. Einnig fengu allir keppendur gjafabréf frá Kaffi krús og Konungskaffi.
Skipuleggjendur vilja koma á framfæri þökkum til allra þátttakenda, styrktaraðila og dómnefnd fyrir að gera þennan dag einstaklega skemmtilegan.
